Celebrating International Yoga Day

 

आरोग्य उत्तम राखण्यासाठी योग हे प्रभावी साधन : योग प्रशिक्षक नरेंद्र देशपांडे 

मिरज कन्या महाविद्यालयात योग दिन साजरा

मिरज: मानवी शरीर हे स्वतःच एक दवाखाना असून अनेक उपायांनी ते स्वतःच दुरुस्त होत असते. मानवी मन, शरीर व भावना यांच्यात समतोल राखण्यासाठी योगासने मदत करतात. नियमित योगासने करून शारीरिक, मानसिक, भावनिक व बौद्धिक उन्नती साधता येते. सध्याच्या धकाधकीच्या जीवनशैलीत आरोग्य उत्तम राखण्यासाठी योग हे अत्यंत प्रभावी साधन असल्याचे प्रतिपादन पतंजली योग समितीचे योग प्रशिक्षक श्री. नरेंद्र देशमुख यांनी केले. आंतरराष्ट्रीय योग दिनानिमित्त मिरजेतील कन्या महाविद्यालयात आयोजित कार्यक्रमात ते प्रमुख पाहुणे म्हणून बोलत होते. अध्यक्षस्थानी कनिष्ठ विभागाच्या उपप्राचार्या डॉ. सुनिता माळी होत्या. 

        प्रतिवर्षीप्रमाणे याही वर्षी आंतरराष्ट्रीय योग दिन मोठ्या उत्साहात साजरा करण्यात आला. या कार्यक्रमाचे आयोजन शारीरिक शिक्षण व क्रीडा विभाग, राष्ट्रीय सेवा योजना आणि राष्ट्रीय छात्र सेना या विभागांनी संयुक्तपणे केले. आयोजनासाठी पतंजली योग समितीचे विशेष सहकार्य लाभले. या कार्यक्रमात प्रमुख पाहुणे श्री. देशपांडे यांनी मार्गदर्शनासोबत विविध आसनांचे प्रात्यक्षिक दाखवत ती आसने विद्यार्थिनी व प्राध्यापकांकडून करवून घेतली. यामध्ये वृक्षासन, त्रिकोणासन, वज्रासन, वक्रासन, पद्मासन, उत्तानासन, शलभासन, ताडासन, ध्यान, अनुलोम-विलोम इत्यादिंचा समावेश होता.  

        या कार्यक्रमामध्ये विद्यार्थिनी व प्राध्यापकांनी आपला सहभाग नोंदवला. कनिष्ठ विभागाच्या शारीरिक शिक्षण संचालिका प्रा. सौ. मृदुला कुलकर्णी यांनी स्वागत व प्रास्ताविक केले. वरिष्ठ विभागाचे शारीरिक शिक्षण संचालक प्रा. बाबासाहेब सरगर यांनी पाहुण्यांचा परिचय करून दिला. आभार प्रा. पांडुरंग तपासे यांनी मानले. कनिष्ठ विभाग राष्ट्रीय सेवा योजना कार्यक्रम अधिकारी प्रा. तुषार पाटील यांनी सूत्रसंचालन केले. कार्यक्रमाच्या संयोजनासाठी महाविद्यालयातील प्राध्यापक वर्गाचे सहकार्य लाभले. 

   

दैनिक महासत्ता

Activity Report