शिवाजी विद्यापीठ अंतर्गत सांगली विभागीय कबड्डी (महिला) स्पर्धा

 

शिवाजी विद्यापीठ सांगली विभागीय महिला कबड्डी स्पर्धेत श्रीमती मथुबाई गरवारे महाविद्यालय अजिंक्य

 * गरवारे महाविद्यालयास 'श्रीमती विजयाताई बाबासाहेब देशमुख अखंड फिरता चषक'

 * कन्या महाविद्यालय, मिरज यांच्या वतीने आयोजन; सांगलीवाडीत स्पर्धा उत्साहात संपन्न

 * चारही संघांची कराड येथील आंतरविभागीय स्पर्धेसाठी निवड

सांगलीवाडी / मिरज:

दि न्यू मिरज एज्युकेशन सोसायटी संचलित कन्या महाविद्यालय, मिरज यांच्या वतीने आयोजित शिवाजी विद्यापीठ अंतर्गत सांगली विभागीय महिला कबड्डी स्पर्धा २०२६-२७ सांगलीवाडी येथील मा. दिनकर (तात्या) पाटील बहुउद्देशीय हॉलमध्ये अत्यंत उत्साहात व चुरशीच्या वातावरणात संपन्न झाल्या. या स्पर्धेत उत्कृष्ट खेळाचे प्रदर्शन करत श्रीमती मथुबाई गरवारे कन्या महाविद्यालय, सांगली संघाने अंतिम फेरीत विजय मिळवत अजिंक्यपद पटकावले. या स्पर्धेसाठी युवक तरुण मराठा क्रीडा संस्थेचे विशेष सहकार्य लाभले. संपूर्ण स्पर्धेचे नेटके व उत्कृष्ट नियोजन कन्या महाविद्यालयाचे शारीरिक शिक्षण संचालक डॉ. बाबासाहेब सरगर यांनी केले.

स्पर्धेचे उद्घाटन प्रमुख पाहुणे आमदार दिनकर (तात्या) पाटील यांच्या हस्ते करण्यात आले. खेळाडूंना मार्गदर्शन करताना ते म्हणाले की, "क्रीडा क्षेत्रात महिलांनी मारलेली भरारी आज संपूर्ण देशाचा अभिमान ठरत आहे. कबड्डी हा केवळ ताकदीचा नव्हे, तर गती, चपळता आणि रणनीतीचा खेळ आहे. अशा स्पर्धांमुळे ग्रामीण व शहरी भागातील खेळाडूंच्या अंगभूत गुणांना वाव मिळतो. पराभवाने खचून न जाता सातत्यपूर्ण सराव, कठोर परिश्रम आणि खेळातील शिस्त जपल्यास राष्ट्रीय व आंतरराष्ट्रीय स्तरावर नक्कीच यश संपादन करता येते." 

कार्यक्रमाच्या अध्यक्षस्थानावरून बोलताना दि न्यू मिरज एज्युकेशन सोसायटीचे अध्यक्ष विनायकराव गोखले म्हणाले की, "शिक्षणासोबतच खेळाला तितकेच महत्त्वाचे स्थान दिले पाहिजे. खेळामुळे विद्यार्थ्यांमध्ये नेतृत्वगुण, निर्णयक्षमता आणि खिलाडूवृत्ती निर्माण होते."

याप्रसंगी सांगली, मिरज व कुपवाड शहर महानगरपालिकेचे नगरसेवक अजिंक्य (भैय्या) पाटील, डॉ. पतंगराव कदम महाविद्यालय (सांगलीवाडी) चे प्राचार्य डॉ. डी. जी. कणसे, कन्या महाविद्यालय मिरज चे प्राचार्य डॉ. उल्हास माळकर, ज्येष्ठ मार्गदर्शक सुधीर वाटवे, सांगली जिल्हा क्रीडा परिषदेचे सचिव डॉ. आकाश बनसोडे, प्रा. वैभव पाटील यांच्यासह विविध महाविद्यालयांमधून आलेले शारीरिक शिक्षण संचालक व क्रीडाप्रेमी मोठ्या संख्येने उपस्थित होते.

स्पर्धेतील सर्व सामन्यांचे उत्कृष्ट व काटेकोर संयोजन सांगली जिल्हा कबड्डी असोसिएशनचे पंच प्रमुख आलम मुजावर व त्यांच्या पंच चमूने केले.

सामन्यांचे निकाल:

 * उपांत्य फेरी: पहिल्या सामन्यात श्रीमती मथुबाई गरवारे कन्या महाविद्यालय (सांगली) संघाने अण्णासाहेब डांगे कॉलेज ऑफ इंजिनिअरिंग (आष्टा) संघावर मात केली. दुसऱ्या उपांत्य फेरीत श्रीमती कुसुमताई राजारामबापू पाटील महाविद्यालय (ईश्वरपूर) संघाने कन्या महाविद्यालय (मिरज) संघाचा पराभव करत अंतिम फेरीत धडक मारली.

 * तृतीय व चतुर्थ क्रमांक: अण्णासाहेब डांगे कॉलेज ऑफ इंजिनिअरिंग (आष्टा) संघाने उत्तम कामगिरी करत तृतीय क्रमांक मिळवला.

 * अंतिम सामना: मथुबाई गरवारे कन्या महाविद्यालय आणि कुसुमताई राजारामबापू पाटील महाविद्यालय यांच्यात रंगलेल्या अटीतटीच्या अंतिम सामन्यात गरवारे महाविद्यालयाने विजय संपादन करत विजेतेपदावर आपले नाव कोरले. कुसुमताई राजारामबापू पाटील महाविद्यालयाला उपविजेतेपदावर समाधान मानावे लागले.

या स्पर्धेतील अव्वल चारही संघांची संत गाडगे महाराज कॉलेज, कराड येथे २१ ऑक्टोबर २०२६ रोजी होणाऱ्या शिवाजी विद्यापीठ अंतर्गत आंतरविभागीय कबड्डी स्पर्धेसाठी निवड झाली आहे.

स्पर्धेचा बक्षीस वितरण समारंभ डॉ. पतंगराव कदम महाविद्यालय, सांगलीवाडीचे प्राचार्य डॉ. डी. जी. कणसे यांच्या हस्ते पार पडला. कन्या महाविद्यालय, मिरज यांच्या वतीने सहभागी सर्व यशस्वी संघांना आकर्षक ट्रॉफी देऊन गौरविण्यात आले. तसेच प्रथम क्रमांक विजेत्या श्रीमती मथुबाई गरवारे कन्या महाविद्यालय, सांगली या संघास मानाचा 'श्रीमती विजयाताई बाबासाहेब देशमुख अखंड फिरता चषक' प्रदान करण्यात आला. प्राचार्य डॉ. डी. जी. कणसे यांनी सर्व खेळाडूंचे कौतुक करत पुढील आंतरविभागीय स्पर्धेसाठी मनःपूर्वक शुभेच्छा दिल्या.

कार्यक्रमाचे प्रास्ताविक व स्वागत शारीरिक शिक्षण संचालक डॉ. बाबासाहेब सरगर यांनी केले. प्रमुख पाहुण्यांची ओळख डॉ. माधुरी देशमुख यांनी करून दिली. सूत्रसंचालन प्रा. रमेश कट्टीमणी यांनी केले, तर प्रा. अभिनव औरादकर यांनी आभार मानले.

हात पाय आणि पूर्ण अंग दुखणे यामागे पेशींमध्ये काय घडते

 *हात पाय आणि पूर्ण अंग दुखणे यामागे पेशींमध्ये काय घडते ते सोप्या भाषेत समजून घेऊ*

पेशीमध्ये नेमके काय होते

१. जळजळ तयार होते

आपण खूप काम केले, चुकीचे बसलो, झोप कमी झाली की पेशींमध्ये दुखणे निर्माण करणारे रसायन तयार होते, सूज येते.

त्याला इन्फ्लेमेशन म्हणतात, यामुळे नसा दुखू लागतात

२. आम्ल साचते

जास्त कष्ट किंवा व्यायाम केला की पेशींना पुरेसा ऑक्सिजन मिळत नाही

मग पेशीत लॅक्टिक ऍसिड नावाचे आम्ल साचते आणि अंग आखडल्यासारखे दुखते

३. ऊर्जा कमी होते

आपल्या पेशीत मायटोकॉन्ड्रिया नावाचे ऊर्जा घर असते

पाणी कमी प्यायले, लोह, व्हिटॅमिन डी आणि बी १२ कमी असेल तर ऊर्जा बनत नाही आणि थकवा आणि दुखणे येते

४. वात वाढतो

आयुर्वेदानुसार थंडी, जागरण, उपाशी राहणे, वातूळ पदार्थ खाणे याने वात वाढतो

वात वाढला की सांधे, कंबर, हात पाय सगळीकडे दुखते

दुखणे थांबण्यासाठी रोजच्या जीवनात काय बदलावेत

सकाळी उठल्यावर कोमट पाणी प्या दिवसभर दोन ते अडीच लिटर पाणी प्या

रोज ७ ते ८ तास सलग झोप घ्या, रात्री ११ नंतर जागू नका

रोज २० मिनिटे कोवळ्या उन्हात बसा, याने व्हिटॅमिन डी वाढते

एकाच जागी तासन्तास बसू नका, दर ४५ मिनिटांनी उठून दोन मिनिटे चालून घ्या

रोज सकाळी १५ मिनिटे हलका व्यायाम, स्ट्रेचिंग आणि प्राणायाम करा

तळलेले, मैदा, कोल्ड्रिंक, जास्त साखर आणि रात्री दही भात खाणे टाळा

मोबाईल मान खाली घालून जास्त वेळ पाहू नका

रोज रात्री कोमट तेलाने पायाच्या तळव्यांना आणि गुडघ्यांना ५ मिनिटे मालिश करा

*आयुर्वेदिक सोपे उपाय*

१. तेल मालिश - तीळ तेल किंवा महानारायण तेल कोमट करून दुखणाऱ्या भागाला लावा, आठवड्यातून ३ वेळा तरी करा

२. शेक - दुखणाऱ्या भागावर गरम पाण्याच्या पिशवीने किंवा मिठाची पुरचुंडी गरम करून शेक द्या

३. दशमूळ काढा - दशमूळ हे दहा मुळांचे मिश्रण आहे, ते वात कमी करून अंगदुखी कमी करते, आयुर्वेदिक डॉक्टरच्या सल्ल्याने घ्यावा

४. अश्वगंधा आणि शल्लकी - अश्वगंधा थकवा आणि झोप सुधारते, शल्लकी आणि गुग्गुळ सांध्यांची जळजळ कमी करते

५. हळद दूध - रात्री झोपताना एक कप कोमट दुधात पाव चमचा हळद आणि चिमूटभर काळी मिरी टाकून प्या, हा नैसर्गिक वेदनाशामक आहे

६. एरंडेल तेल - आठवड्यातून एकदा रात्री एक चमचा कोमट पाण्यासोबत घेतल्याने पोट साफ होते आणि वात कमी होतो, पण डॉक्टरला विचारूनच घ्या

७. आहारात - तूप, मूग डाळ, सुंठ, लसूण, पिकलेले आवळा आणि मोसंबी यांचा वापर वाढवा

जर दुखणे ७ दिवसांपेक्षा जास्त राहत असेल, सूज येत असेल, ताप असेल किंवा हाताला मुंग्या येत असतील तर रक्त तपासणी करून व्हिटॅमिन डी, बी १२ आणि थायरॉईड तपासून घ्या . वैद्यकीय सल्ला घ्या.

डॉ मानसी पाटील

📲*हा संदेश आपल्या कुटुंबीय व मित्रांना नक्की शेअर करा!🌹*

* *विशेष सूचना :- हा मेसेज वेळात वेळ काढून वाचावा आणि इतरांच्या माहितीत भर पडावी म्हणून पुढे शेअर करावा 📲*

*(कॉपी पेस्ट)*